8-се дәрес. Минең характерым

– Айгөл, ә һин беләһеңме кешеләрҙе характерына ҡарап, 4 төргә бүлеп йөрөтәләр икән.

– Юҡсы, ә ниндәйҙәр?

– Кешенең тормоштағы мөнәсәбәте буйынса: йомоҡ йәки аралашыусан; тыйнаҡ йәки маҡтансыҡ; тырыш йәки ялҡау; бөхтә йә әрпеш.

– Бигерәк ҡыҙыҡ икән. Ә мин кешеләрҙе характеры буйынса 4 темпераментҡа бүлеүҙәрен белдем әле.

– Ниндәйҙәр?

– Холерик, флегматик, сангвиник һәм меланхолик.

– Ә эйе, ул хаҡта белә инем, ә мин шулай уҡ эске донъяһына ҡарап, кешеләрҙең интроверттарға һәм экстраверттарға бүленеүен дә асыҡланым.

– Ул хаҡта ишеткәнем юҡ, ниндәйҙәр инде улар?

– Интроверттар – улар үҙ эсенә йомолған, үҙ донъяһында йәшәүселәр. Яңғыҙлыҡ яраталар, бар нәмәне анализлайҙар. Уларҙың дуҫтары аҙ, тиҙ генә яңы танышлыҡтар булдыра алмайҙар, ә бына экстраверттар киреһенсә – асыҡ-ярыҡтар, сараларҙың уртаһында ҡайнайҙар.

– Мин экстраверт икән!

– Мин дә!