17-се дәрес. Яҡындағы һәм алыҫтағы дуҫтарым

Лексик тема: Яҡындағы һәм алыҫтағы дуҫтарым

– Айгөл, һинең яҡын дуҫың бармы?

– Әлбиттә. Ул Диана, беҙ мәктәптә бергә уҡый башланыҡ.

– Һин уға ышанаһыңмы?

– Эйе, мин уға тулыһынса ышанам, ул мине бер ҡасан да ташламаясаҡ.

– Һин бәхетле шундай дуҫың булғанға. Дуҫлыҡтың ҡәҙерен белергә кәрәк.

– Мин дә уны төрлө ситуацияларҙа яңғыҙ ҡалдырмайым.

– Һеҙ берәй ваҡыт бәхәсләшкәнегеҙ булдымы?

– Эйе, бәхәсләштек. Ҡай ваҡыт беҙ юҡ нәмә өсөн бәхәсләшеп китәбеҙ, шулай ҙа бер-беребеҙгә үпкә һаҡламайбыҙ. Диана бик тыныс һәм аҡыллы ҡыҙ, конфликтҡа инмәҫкә тырыша.

– Айгөл, һин бик аҡыллы, һылыу ҡыҙ, Диана һинән көнләшмәйме?

– Ой, ул турала уйлағаным юҡ. Быны юҡ-бар тип уйлайым.

– Яҡшы. Ә Дианаға серҙәреңде һөйләйһеңме?

– Һөйләйем, ул минең бөтә серҙәремде белә, сөнки ул минең иң яҡын дуҫым. Уртаҡ серҙәребеҙ булғанға шатмын.

– Ә һинең тағы ла дуҫтарың бармы?

– Эйе, улар йыраҡта йәшәйҙәр. Шулай ҙа улар менән социаль селтәрҙәр аша аралашып торабыҙ.

– Бик яҡшы! Ысын дуҫлыҡ алыҫ араны ла яҡынайта!