11-се дәрес. Баҙарҙа

– Әйҙә, баҙарға!

– Ниндәй баҙар, ти. Хәҙер бит бөтә ерҙә супер, гипермаркеттар.

– Өфөлә, Черниковка биҫтәһендә, “Колхоз баҙары” әле лә эшләй.

– Ысынмы? Ҡыҙыҡ. 

– Эйе, баҙарҙар әлеге көндә лә күп кенә илдәрҙең визит карточкаһы булып тора. Мәҫәлән, Төркиәнең Гранд-баҙары бар донъяла билдәле. Шулай уҡ Испанияның Бокерия баҙары көнөнә генә 40 меңдән ашыу кешене хеҙмәтләндерә. Египеттың  Хан-әл – Хәлил баҙары ла бик данлыҡлы. Бына шулай: баҙарҙар - бик ҡыҙыҡлы ер ул.

– Унда һатыулашырға кәрәкме?

– Эйе, был - баҙарҙың төп үҙенсәлеге.

– Ә «Колхоз баҙарында» нимәләр һатыла?

– Был баҙарҙа ла нәмә генә юҡ. Аҙыҡ-түлек, йорт-кәрәк яраҡтары, кейем-һалым һәм төрлө йорт хайуандарын да табырға мөмкин. 

– Ә хаҡтар нисек?

– Бында хаҡтар Өфө ҡалаһынан сағыштырмаса күпкә арзаныраҡ, унан һатыулашырға ла була.

– Нимә менән барабыҙ?

– Баҙарға бөтә төр транспорт та йөрөй.

– Бик хуп, барайыҡ!